Umutoza Joslin Bipfubusa: igisubizo ku ruhuri rw’ibibazo biri muri Kiyovu?
Kuri uyu wa Gatatu, ikipe ya Kiyovu Sports yatangaje Umurundi Bipfubusa Joslin nk’umutoza wayo mushya asimbuye Petros Koukouras. Ibi iyi kipe yabitangaje ibinyujije ku mbuga zayo nkoranyambaga nyuma y’uko n’ubundi ku wa 21 Ugushyingo 2023 yari yatangaje ko yatandukanye ku bwumvikane n’Umugereki wayitozaga Petros Koukouras. Uyu mutoza w’imyaka 39 y’amavuko yasinye amasezerano y’umwaka umwe atoza […]
Kuri uyu wa Gatatu, ikipe ya Kiyovu Sports yatangaje Umurundi Bipfubusa Joslin nk’umutoza wayo mushya asimbuye Petros Koukouras.
Ibi iyi kipe yabitangaje ibinyujije ku mbuga zayo nkoranyambaga nyuma y’uko n’ubundi ku wa 21 Ugushyingo 2023 yari yatangaje ko yatandukanye ku bwumvikane n’Umugereki wayitozaga Petros Koukouras.
Uyu mutoza w’imyaka 39 y’amavuko yasinye amasezerano y’umwaka umwe atoza ikipe ya Kiyovu Sports, aje kuyifasha nyuma y’imikino icumi imaze gukina muri shampiyona ya 2023-2024.
Bipfubusa Joslin yatozaga ikipe ya Bumamuru FC yo mu Burundi akaba yaranahembwe nk’umutoza mwiza w’umwaka w’imikino 2022-2023, aho yari amaze kuyihesha igikombe cya shampiyona muri icyo gihugu afite amanota 68.
Si ubwa mbere kandi uyu mutoza yumvikanye mu mupira w’amaguru wo mu Rwanda kuko Tariki 23 Kamena 2022, Ikipe ya Espoir FC yatangaje ko yamaze kumvikana na Bipfubusa Joslin yewe anasinya amasezerano y’imyaka ibiri yagombaga kuyitoza ahereye mu mwaka w’imikino wa 2022-2023.
Gusa ariko kuyitoza ntabwo byabaye kuko nyuma y’iminsi mike uyu mugabo yahise yerekeza mu ikipe ya Police yo muri Tanzania, agenda nta mukino n’umwe atoje muri Espoir FC.
Kugeza ubu Kiyovu Sports iri ku mwanya wa gatanu muri shampiyona aho ifite amanota 15 mu mikino 10 imaze gukina.
Mu minsi yatambutse, iyi kipe yagiye ivugwamo ibibazo bitandukanye, akenshi bigira aho bihurira n’amikoro, ndetse n’umutoza ucyuye igihe akaba hari ubwo yahururizaga abakinnyi babaga ntako bahagaze ku bijyanye n’ubushobozi mu by’ubukungu.
Shyaka Josbert
Leave a Comment