Mu Bwongereza hakinwaga shampiyona ku munsi wayo wa 13, aho amakipe ahabwa amahirwe yo gutwara igikombe kurusha ayandi, Manchester City na Liverpool zagombaga kwisobanira. Ni umukino warangiye aya makipe aganije igitego kimwe ku kindi, umukinnyi Erling Haaland akaba yatsinze igitego cyatumye yuzuza ibitego 50 muri shampiyona y’u Bwongereza ari gukinamo umwaka wa kabiri aho yabitsinze mu mikino 48.

Ni umukino wahuzaga aya makipe yombi yari akurikiranye ku rutonde rwa shampiyona aho Man City yari iya mbere n’amanota 28 mu gihe Liverpool yari iya kabiri n’amanota 27.Ikipe ya Man City yatangiye umukino iteza ibibazo ikipe ya Liverpool binyuze ku bakinnyi nka Jeremy Doku na Bernardo Silva bahinduraga imipira bashaka rutahizamu Erling Haaland.

Ku rundi ruhande Mohamed Salah na Darwin Nunez bashakishirizaga Liverpool igitego bafatanyije ariko uwo bari bari hamwe imbere Diogo Jota akaba atari mwiza mu buryo buhagije.Ku munota wa 28 umunyezamu wa Liverpool Alisson Becker yakoze ikosa ubwo yateraga umupira yari afite mu mu ntoki maze akawihera Manuel Akanji wa Man City.

Uyu mupira Manuel Akanji yawufashe maze acenga abakinnyi ba Liverpool barimo Dominik Szoboszlai na Trent Alexander Arnold maze awutanga kuri Erling Haaland wahise nawe awusunika rimwe agatera ishoti rikomeye mu izamu umunyezamu ntiyashobora kuwukuramo atsinda igitego cya mbere cya Man City n’igice cya mbere kirangira gutyo.

Mu gice cya kabiri ku munota wa 54 Diogo Jota wari wagize ikibazo cy’imvune yavuye mu kibuga asimburea na Luis Diaz naho Curtis Jones asimburwa na Ryan Gravenberch.Muri iki gice Liverpool yateyemo amashoti ane(4) muri rusange arimo abiri agana mu izamu,rimwe ryayihiriye ku munota wa 80 ubwo Luis Diaz yateraga umupira Cody Gakpo akawuha umwanya ugafatwa na Mohamed Salah wahise awuha Trent Alexander Arnold wanitwaye neza muri uyu mukino muri rusange. Uyu mupira uyu myugariro nawe yahise awukoresha atera ishoti rigendera hasi atsinda igitego cyo kunganya.

Man City yakomeje gusunika ngo irebe ko yatsinda binyuze ku bakinnyi nka Jeremy Doku ari nako Liverpool nayo abakinnyi nka Luis Diaz bakomeza gusunika ariko iminota 90 isanzwe ndetse n’umunani yongereweho nayo irangira amakipe yombi anganyije igitego 1-1.

Erling Haaland yakoze amateka

Igitego Erling Haaland yatsinze cyatumye yuzuza ibitego 50 muri shampiyona y’u Bwongereza ari gukinamo umwaka wa kabiri aho yabitsinze mu mikino 48. Ibi bimugira umukinnyi wa mbere ugeze kuri ibi bitego mu mikino mike muri iyi shampiyona kuko uwari ufite aka gahigo ari Andrew Cole wari warabitsinze mu mikino 65.

Kunganya kw’aya makipe yombi yakinaga ariyo ari imbere ku rutonde byatumye Man City ikomeza kuba iya mbere n’amanota 29 Liverpool ari iya kabiri n’amanota 28 ariko zose zitegereje ibiva mu mukino urahuza Arsenal na Brentford saa moya n’igice kuko mu gihe yatsinda yagira amanota 30 igafata umwanya wa mbere.

Shyaka Josbert

Ibyerekeye Umwanditsi

Izindi nkuru yanditse

Ivumburamatsiko ku karasisi ka RDF kakozwe bwa mbere mu Kinyarwanda

Murindahabi Irene uri muri Canada yaba ateganya kuzagaruka?

Zion Temple: Abashakaga kweguza Gitwaza bagiriwe inama yo gusaba imbabazi

Reba inkuru zose ze